CEBU CITY-Niawhag ang kapulisan sa dakbayan sa Sugbo sa kabanay sa 19-anyos nga si Rhea Mae Tocmo nga mosumiter og dugang ebedensiya sa ilang mga alegasyon.
Kini human nga nitumaw sa social media ang bag-ong impormasyon nga nagsugyot nga adunay laing responsable sa pagpatay sa Biktima.
Matud pa ni Police Lieutenant Colonel Janette Rafter, ang deputy director for operations sa Cebu City Police Office (CCPO) nga ang giilang si alyas “Lyzza”kinahanglan nga mo-agi og saktong proseso tungod kay bug-at ang alegasyon niini.
Dugang pa, nga mas maayu nga mo-coordinate kini sa mga kapulisan o gani sa laing ahensya sama sa National Bureau of Investigation arun imbistigahan ang mga gipagawas nga pamahayag nga adunay kalabutan sa kaso ni Rhea Mae Tocmo.
Gi-uyonan usab ni Police Major Angelito Valleser, hepe sa Labangon Police Station ang pahayag ni Rafter nga makig-alayon sa mga buhatan sa kapulisan kining nagpailang ‘Lyza’ arun sutaon ang mga giingong ebidensya.
Sa pakighinabi sa Bombo Radyo Cebu News Team kang Valleser, nga kon gani tinuod ang mga gibutyag sa personahe, pasalamatan nila apan og gani walay kamatuoran, pasakaan kini og kaso.
Dugang pa sa hepe, kung basehan ang mga CCTV sa maong dapit, kusganon niyang barugan nga walay kamatuoran ang giingon ni ‘Lyza’ mahitungod sa iyahang giingon nga mga videos nga nagtumbok sa mga tinuod suspetsado.
Una nang nipadayag ang igsuon sa biktima nga si Rotche Tocmo Poblacion, sa iyang pagkadismaya sa imbestigasyon sa kapulisan nga giingong wala pa gihapon mahuman ug hugot ang iyang pagtuo nga adunay laing responsable sa kamatayon ni Rhea Mae.
Kung kahinumdum nga si Rhea Mae napalgang patay sa daplin sa dalan sa Sitio Mohon, Barangay Tisa, dakbayan sa Sugbo, niadtong Hulyo 17, 2023.
