Nanawagan si Navotas Representative Toby Tiangco sa House of Representatives nga ipagawas ang kompletong detalye sa alokasyon sa pondo sa matag distrito sa kongreso ug party-list sa dili pa ang botohan alang sa ratipikasyon sa 2026 General Appropriations Act ugmang adlawa, Disyembre 29.
Sumala ni Tiangco, ang mga magbabalaod dili makabotar kung walay klarong impormasyon kung giunsa pagbahin ang badyet, ug nidugang nga importante nga masiguro nga walay distrito nga adunay sobra nga alokasyon, ug nga ang nahitabo sa 2025 GAA dili na mahitabo pag-usab, diin ang mga pondo gi-inject nga wala mahibal-i sa representante sa distrito.
Samtang, si Batangas 1st District Rep. Leandro Leviste miinsistir nga ang tanan nga gitawag nga “allocables” ug “incentives” para sa mga kongresista ubos sa 2026 budget kinahanglan usab nga ibutyag.
Sumala sa magbabalaod, adunay gitoohang mga alokasyon gikan sa lain-laing mga ahensya sama sa DPWH, DOH, DSWD, DOLE, DA, NIA ug DepEd, dugang pa sa opisyal nga giingon sa mga dokumento.
Gibutyag usab ni Leviste nga giingong gitanyagan siya og “incentives” baylo sa iyang pagboto sa badyet.
Subay niini, giinsistir niya nga ang publiko adunay katungod nga mahibal-an ang tanan nga mga alokasyon ug insentibo sa dili pa hingpit nga aprubahan sa Kongreso ang nasudnong badyet alang sa 2026.
