METRO MANILA-Gikatahong maghimo na ang Kamara og imbestigasyon kalabot sa pagkuyanap sa mga krimen ug ilegal nga kalihokan nga nalambigit sa POGOs.
Kini human nimando si House Speaker Martin Romualdez og komprehensibong imbestigasyon sa Kongreso bahin niini.
Diin karong Hulyo 15 ning tuiga, gitakda ang motu proprio inquiry sa House Committee on Public Order and Safety kauban ang Mga duwa ug Kalingawan bahin sa isyu.
Mao kini ang unang pormal nga imbestigasyon sa Kamara kalabot sa pagkalambigit sa POGO sa nagkalain-laing ilegal nga kalihukan.
Nasayran nga ang maong lakang agi’g pagsuporta sa gobyerno sa pakigbisog sa mga ilegal nga kalihokan ug pagsiguro nga ang kasamtangang mga balaod ug regulasyon husto nga gipatuman.
Niadtong Pebrero, giaprobahan sa Games and Amusements Committee ang resolusyon alang sa permanenteng pagdili sa operasyon sa POGO tungod sa mga krimen sama sa human trafficking, torture, kidnapping, prostitution, ug money laundering.
