Giklaro sa kampo ni kanhi Negros Oriental Congressman Arnolfo “Arnie” Teves Jr. nga walay special treatment alang sa kanhi magbabalaod samtang piniriso kini sa New Bilibid Prison (NBP) sa Muntinlupa City.
Matod sa legal counsel ni Teves nga si Atty. Ferdinand Topacio, nagkasabot sila nga tumanon ang tanang lagda sa mga piniriso lakip na ang pagpaambit sa selda ni Teves sa ubang mga piniriso.
Matod niya nga kini aron malikayan ang posibleng pagsaway batok ni National Bureau of Investigation (NBI) Director Jaime Santiago nga una nang nitug-an sa presscon nga si Teves temporaryo nga mapriso nga mag-inusara sa Building 14 sa Bilibid.
Matod ni Atty. Topacio, sama sa ubang mga prisohan, si Teves anaa sa 10 square meter nga selda uban sa laing mga piniriso nga adunay bunk bed, single toilet ug gamay nga electric fan.
Kahinumduman nga si Arnie Teves kay na-deport sa Pilipinas niadtong Huwebes, Mayo 29 human kini gidakop pag-usab sa mga awtoridad sa Timor-Leste diin siya nangitag asylum.
Gidala si Teves sa NBI headquarters sa Manila niadtong Huwebes sa gabii diin gipaubos siya sa booking procedures ug medical examination dayon niadtong Biyernes sa hapon, si Teves gibalhin sa Building 14 sa Bilibid.
Kahinumduman nga si Teves nag-atubang og daghang kaso sa Pilipinas, apil na niini ang Pamplona massacre diin gipasanginlan siya nga mastermind sa pagpatay kang kanhi Negros Oriental Governor Roel Degamo ug laing 9 ka indibidwal.
