Nagpahigayon og lapad nga operasyon ang kagamhanan sa Dakbayan sa Sugbo niadtong gabii sa Abril 8, 2026, aron pahotan ang kahapsay ug seguridad ubos sa “Safer Cities Initiative.”
Sugod sa alas-10 sa gabii hangtod tungang gabii, nagtinabangay ang kapolisan, traffic management, social services, ug uban pang ahensya sa gobyerno aron masiguro nga gisunod ang mga balaod ug ordinansa sa tibuok syudad.
Miabot sa 382 ka mga tawo ang nadakpan, namulta, o gi-warningan tungod sa nagkadaiyang kalapasan.
Pinakadaghan sa mga nadakpan mao ang mga menor de edad nga nakalapas sa curfew nga miabot og 111 ka buok, gisundan sa 100 ka indibidwal nga nanigarilyo sa pampublikong lugar, 87 ka tawo nga nag-shirtless o walay t-shirt (anti-indecency), ug 48 ka mga indibidwal nga nag-inom sa daplin sa dalan.
Gawas niini, duna say 25 ka mga violator sa traffic, upat ka illegal structures nga nakababag sa dalan, ug pito ka uban pang mga ordinansa ang nalapas, samtang ang mga menor de edad nga nadakpan gi-turn over dayon sa social welfare authorities aron maseguro ang ilang kaluwasan ug mahatagan og saktong giya.
Ang maong kalihokan subay sa mando sa Department of Interior and Local Government (DILG).
