SOUTHEAST ASIA- Milapas na sa 200 ang ihap sa nangamatay tungod sa pagkuso-kuso sa Bagyong Yagi sa Southeast Asian countries, diin labing grabeng naigo nga nasud mao ang Vietnam, nga nisaka ngadto sa 197 ang namatay samtang 8 usab ang kompirmadong patay sa amihanang Thailand diin usa ka distrito ang nag-antos sa giisip nga pinakagrabe nga baha sa miaging 80 ka tuig.
Karong weekend ang bagyo miigo sa Vietnam nga nagdala usab og kusog nga ulan sa ubang kanasuran sa rehiyon sama sa Laos, Thailand ug Myanmar nga maoy hinungdan sa pagdahili sa yuta ug kaylap nga pagbaha.
Nipagawas usab ang Mekong River Commission og pasidaan sa baha karong Huwebes sa makasaysayanong dakbayan sa Laos sa Luang Prabang.
Gipalihok sa gobyerno sa Thailand ang ilang militar aron motabang sa mga paningkamot sa pagtabang ug nagpadala ug 3 ka helicopter aron magpahigayon og aerial survey sa sitwasyon sa mga apektadong lugar.
Sa Myanmar, ang kapital nga siyudad sa Naypyidaw nakasinati sa pinakagrabe nga pagbaha.
Samtang, milyon-milyon usab sa rehiyon ang nabahaan diin ilang mga balay, nawad-an sa suplay sa kuryente ug naguba usab ang pipila ka mga imprastraktura tungod sa epekto sa bagyo.
