Mokabat sa 22,311 ka indibidwal o 7,884 ka pamilya ang gipabakwit sa mga rehiyon sa Calabarzon ug Rehiyon V tungod sa pagkuso-kuso sa Bagyong Ramil, sumala sa taho sa National Disaster Risk Reduction and Management Council (NDRRMC).
Tungod sa dili maayo nga panahon, temporaryo nga gisuspinde ang operasyon sa 39 ka mga pantalan, apil na ang mga rehiyon sa Central Luzon (Region III), Calabarzon, ug Bicol (Region V).
Nikusog og gamay ang bagyong Ramil hinungdan nga walo ka mga lugar ang gipaubos sa Tropical Cyclone Wind Signal No. 2, ug sa pinakaulahing bulletin, nagpabiling lig-on si Ramil samtang anaa kini sa baybayon sa Alabat, Quezon.
Giisa ang Signal No. 2 sa 17 ka mga lugar, samtang ang PAGASA nipagawas usab og pasidaan sa kusog nga hangin sa sidlakan ug kasadpang kabaybayonan sa Luzon.
Gipaabot usab ang minimum ngadto sa kasarangan nga risgo sa storm surge nga adunay mga balod nga moabot hangtod sa 2.0 metros sulod sa 36 ka oras.
Ingon man nga makaapekto kini sa ubos nga mga dapit ug bukiron nga kabaybayonan sa: Isabela; Ilocos Norte, Ilocos Sur, La Union, Pangasinan, Zambales, Aurora, Quezon, Marinduque, Camarines Norte, Camarines Sur, Catanduanes, Albay ug Masbate.
Subay niini, gitambagan ang publiko, ilabina kadtong naa sa mga apektadong lugar nga magmatngon ug mosunod sa tambag sa lokal nga awtoridad.
