Makasinati na og hinabang ang mga residente ug turista sa Isla sa Malapascua sa kahasol sa pagkapalong sa kuryente tungod sa generator sets nga giabangan sa Cebu Provincial Gov’t gikan sa pribadong kompanya.
Ang generator sets gipanag-iya sa Dynamic Power, nga usa ka pribadong kompanya ug makahatag sa isla og 2 megawatts nga kuryente, butang nga wala pa matuman sukad sa Semana Santa tungod sa pagkadili kasaligan sa suplay sa kuryente sa isla.
Kini maoy gibutyag sa tigom sa Kapitolyo karong adlawa, Mayo 21, 2024.
Ang operasyon naglakip sa unom ka mga trak nga magdala sa mga importanteng ekipo, lakip na ang mga generator set ug mga transformer, aron mapausbaw ang electrification sa isla.
Kini nga interbensyon nunot sa kasabutan tali sa Kapitolyo ug Power Source Philippines Inc. (PSPI), ang bugtong power distributor sa isla.
Sa nagpadayong brownout sa isla, niingon ang gobernador nga gipamub-an sa mga turista ang ilang pagpuyo tungod kay hasol kaayo.
Gipaabot nga mobisita si Gov. Gwen sa Malapascua aron sutaon ang pag-uswag ug epekto sa mga paningkamot sa elektripikasyon.
