CEBU – Giawhag sa Cebu City Police Office ang mga political supporters nga likayan ang paglangkat o pagsulat og negatibong komento sa mga poster sa kampanya sa mga kaatbang, ilabi na sa pagsugod sa lokal nga kampanya niadtong Biyernes, Marso 25, 2022.
Nahimo ang pamahayag sa CCPO subay sa mga taho nga ilang nadawat bahin sa mga campaign posters nga gisuwatan og mga negatibong komento sa wala mailhing mga tawo.
Ang paglikay sa pagbuhta sa ingon, mamahimong makatabang sa paglikay sa posibleng dili pagsinabtanay nga makasamok sa gipaabot nga malinawon nga piniliay sa dakbayan sa Sugbo.
Una niini, gihingusgan sa mga representante sa Commission on Elections (Comelec) nga ilaha pang pahugtan ang Oplan Baklas inubanan sa koordinasyon sa kapulisan.
Apan giklaro sa CCPO nga dili kini moapil sa aktuwal nga pagtangtang sa dagkong mga campaign materials ug bugtong ang mga representante sa Comelec lang ang responsable sa pagtangtang sa maong mga ilegal nga materyales.
Tataw nga alang lamang sa seguridad sa lugar ang presensya sa kapulisan.
