TOLEDO CITY-Giandam na sa kapolisan sa dakbayan sa Toledo ang kasong murder batok kang Lorben Larot, ang lalaki nga nakit-an nga kuyog ug nag-check in sa usa ka lodging house kauban ang 18-anyos nga batang babaye, usa ka adlaw sa wala pa madiskubre ang patyang lawas niini.
Gipaambit ni Police Major Ian Macatangay, ang chief public information officer sa Cebu Police Provincial Office (CPPO), nga nagpadayon ang manhunt operation batok kang Larot, kinsang suspek.
Matod ni Macatangay nga dili sila mohunong hangtod nga madakpan ug mapriso si Larot.
Samtang gipangita sa kapolisan si Larot, si Macatangay niingon nga nagpaabot usab sila sa resulta sa autopsy sa dalagita ilabi na nga matino ang hinungdan sa kamatayon niini ug kon gilugos ba kini.
Nagduda ang kapulisan nga natuok ang dalagita hangtod nga namatay tungod sa mga samad nga nakita sa iyang liog, ingon man ang panyo nga gibutang sa baba sa biktima.
Ug kon gani mapamatud-an nga gigulos ang biktima, madungagan pa ang kaso nga ipasaka batok kang Larot.
Sa pikas bahin, giawhag ni Macatangay ang mga ginikanan nga siguruhon kanunay kung asa paingon ang ilang mga anak, lakip usab ang pagmonitor sa ilang mga kalihokan sa social media aron malikayan ang kadaot.
