CENTRAL VISAYAS- Mikunhod og anaa sa 21.29 porsyento ang krimen sa Central Visayas sulod sa milabay nga 70 ka adlaw o gikan sa Nobyembre 3, 2024, ngadto sa Enero 11, 2025, kon itandi sa Enero 12, 2025 ngadto sa Marso 2025, basi sa gipagawas nga datos sa Police Regional Office-Central Visayas(PRO7).
Sumala sa usa ka report nga gihimo sa Philippine National Police (PNP) Crime Information Reporting and Analysis System (CIRAS), adunay dokumentado nga 21.29 porsyento nga pagkunhod sa itandi sa walo ka focus nga krimen.
Kung diin, ang mga insidente mikunhod og anaa sa 178, kana gumikan kay gikan sa 836 sa panahon sa Nobyembre 3, 2024, hangtod sa Enero 11, 2025 anaa na lamang kini sa 658 gikan sa Enero 12, 2025, ngadto sa Marso 22, 2025.
Kini nga mga rekord nagpakita sa pagka-epektibo sa mga inisyatibo sa pulisya sama sa dugang nga visibility ug gipauswag nga mga operasyon sa checkpoint.
Dugang pa, ang PRO 7 makanunayon nga nakab-ot ang Crime Clearance Efficiency (CCE) rate nga 96.68 porsyento sa panahon sa eleksyon gikan sa Enero 12 hangtod Marso 22, 2025.
Ang Index Crime Solution Efficiency misaka ug 4.99 porsyento, tungod sa dali nga pagtubag sa mga personahe nga misangpot sa pagkasikop sa mga sad-an ug pagpasaka sa tukmang kaso sa korte.
Subay niini, si Police Brigadier General Redrico Maranan, ang Regional Director sa PRO7, nihatag og gibug-aton sa pasalig sa rehiyon sa pagpatunhay sa pagkunhod sa krimen pinaagi sa pagpatuman sa balaod, edukasyon sa publiko, ug kooperasyon sa inter-agency, pagpasiugda og mas luwas nga palibot ug pagkunhod sa kriminalidad sulod sa Central Visayas.
