GIJANG BUSAN, SOUTH KOREA-Naputos sa kahadlok ang mga staff ug kliyente ang usa ka bangko sa Gijang Busan, South Korea sa dihang gitulis sila sa usa ka lalaki nga armado og “pusil” nga giputos sa itom nga plastik, apan ang pusil kay usa diay ka water gun nga adunay disenyo nga dinosaur.
Sa video makita ang suspek nga nagtaptap sa nawong ug nag-jacket nga misulod sa bangko ug adunay bitbit nga attache case.
Pipila lang ka gutlo, mideklarar kini og holdap ug gition ang “pusil” nga iyang gigunitan ngadto sa mga tawo.
Kay wala man siya makasulod sa opisina sa manager kay sirado, igo na lang niyang gimandoan ang mga kawani sa bangko nga ibutang ang kuwarta sa iyang gibitbit nga bag.
Ang kuwarta nga iyang gipangayo nagkantidad og 50,000 won, nga katumbas lang sa kapin sa P2,000.
Apan samtang gipaluhod niya ang mga tawo sa bangko, usa ka lalaki ang nangahas sa pagdakop sa suspek hangtod nga natumba kini sa yuta.
Gitabangan sa mga tawo ang pagkupot sa suspek hangtod nga naabot ang mga polis.
Dihang gisusi sa kapolisan ang “pusil” sa suspek, ilang nasuta nga water gun lang kini nga adunay disenyo nga dinosaur.
