CEBU CITY — Padayong gisuta sa PNP kung unsa man ang motibo sa kamatayon sa usa ka lalaki sa Brgy. Dauis Norte, sa lungsod sa Carmen, Cebu kinsang gipusil sa wala matino nga gunman.
Napalgang patay ang biktima nga si Jasper Perez, 30 anyos, ug residente sa Danao City diin gihiktan ang mga kamot ug tiil niini ug gitaptapan pa ang mata ug baba gamit ang masking tape.
Matud ni Police Corporal Paul Winmar Bariga sa Carmen Police Station nga mi-report sa ilang buhatan ang usa ka habalhabal driver kinsang unang nakakita sa patayng lawas ni Perez sa dalan.
Sa dihang miresponde ang mga kapulisan, ilang nakit-an nga napuno sa samad-pinusilan ang lawas sa biktima.
Narekober hinuon sa crime scene ang walo ka kabhang sa caliber 45 nga armas, duha ka mga buhing bala, ug usa ka deformed slug sa bala.
Dugang pa ni Bariga nga giingong nalambigit si Perez sa ginadiling drugas, base sa pagsaysay sa mga silingan niini.
Kasamtangan pang gisuta sa kapulisan ang identity sa nagpatay sa biktima subay na sa nagpadayong imbestigasyon niini.
