CEBU – Nasikop sa National Bureau of Investigation (NBI) ang usa ka lalaki kinsa nagpa-ila nga nanag-iya og yuta sa Zone Ahos, Barangay Paknaan dakbayan sa Mandaue.
Mismong si Atty. Julius Cesar Entise ang acting City Assessor sa dakbayan sa Mandaue, ang nikompirmar sa mga peke nga dokumento nga nakuha gikan sa suspetsado.
Giila sa otoridad ang suspek nga si Raul Villacarlos Canoy kinsa nagpaila nga maoy nanag-iya sa mga luna lakip na ang timberland diha sa Zone Ahos sa Barangay Paknaan.
Gibutyag ni NBI District Supervisor Arnel Pura nga ilang gipatawag si Canoy nunot sa reklamo sa Mandaue City Government nga gi-representahan ni Atty. Jamaal James Calipayan, ang City Administrator sa siyudad kalabot sa pagpamaligya og yuta nga gipanag-iya sa siyudad basi sa City Charter nga namugna niadtong 1969.
Gipanawagan ni Pura kadtong mga nakapalit o nagdata-data og mga luna sa maong lugar nga mopakita sa ilang buhatan sa NBI aron mapasakaan pa og dugang kaso si Canoy.
Gipasabot usab ni Entise nga niadto pang tuig 2017 sila nahibawo dihang gisugdan pag-reclaim ang luna sa Zone Ahos sa Barangay Paknaan apan wala makapahunong ang miaging administrasyon.
Daghan na ang nagtukod og mga residensya sa maong lugar gani aduna pa’y mga propesyonal sama sa mga maestra ug mga pulis ang nakapalit og yuta sa maong lugar.
