SIBONGA-Nabangga-patay ang usa ka lalaki nga bag-o ra nauli gikan sa gawas sa nasud human nga nagbangga ang iyang motor sa ceres bus gahapong adlawa, Abril 9, 2025 sa National Highway sa Barangay, Candaguit lungsod sa Sibonga, Cebu.
Ang biktima nailhan nga si Orestes Mirabueno Salutello, hingkod ang pangidaron, usa ka seaman taga Barangay. Poblacion, sa naasoy nga lungsod.
Samtang, ang drayber sa ceres bus nailhan nga si Guillermo Lebosada Cabañog, 45 anyos, taga Barangay Uling, dakbayan sa Naga.
Matud pa ni Police Captain Feb Abadilla Seares, nga padulong uli si Salutello, gikan kini sa iyang inahan para maghatud ug pasalubong sa dihang ang motorsiklo nga gimaneho sa biktima maoy misugat ug mibangga sa nagpadulong nga bus ug nalagpot ang biktima pipila ka metros sa maong nahimutangan.
Ang biktima gidala sa mga sakop sa Sibonga Rescue Team ngadto sa District Hospital sa dakbayan sa Car-Car apan sa wala madugay gideklara ang biktima nga dead on arrival.
Samtang sa pikas bahin, ang drayber sa ceres bus kasamtangang gikustudiya sa Sibonga Police Station samtang gipaabot pa ang desisyon sa pamilya sa biktima sa pagpasaka ug kaso batok sa driver.
