Subay kamandoan nga gipirmahan ni LTFRB Chairman Teofilo E. Guadiz III, ang LTFRB nimando sa “Move It” nga hunongon ang operasyon sa Sugbo ug Cagayan de Oro tungod kay wala kini tugoti sa Technical Working Group (TWG) nga maka-operate sa maong mga dapit.
Matod sa LTFRB, ang “Move It” mohunong sa operasyon sa Cebu City ug Cagayan de Oro City, tungod kay ang mga rekord ug ebidensya nga gisumite klaro nga nagpakita nga wala kini gihatagan og bisan unsang pagtugot sa TWG sa pag-operate niining mga dapita.
Kahinomdoman, nga kaniadtong 2019, ang Transportation department nimando sa LTFRB nga magtukod ug technical working group aron bantayan ang rollout sa mga serbisyo sa motorcycle taxi.
Ang maong lagda, tumong nga makamugna og mga rekomendasyon sa kaluwasan, seguridad, franchising, ug mga pamaagi sa regulasyon.
Dugang niana, matud pa sa LTFRB, ang “Move it” nakit-an nga milapas sa awtorisado nga rider cap allocation ug napakyas sa pagtuman sa mandatory reporting requirements sa rider activation, deactivation, ug reactivation, sumala sa gilatid ubos sa motorcycle taxi pilot program.
Ang LTFRB nagkanayon nga samtang ang motorcycle taxi guidelines naghatag ug patas nga pag-apod-apod sa alokasyon, ang redistribution nga kaniadto giuyonan sa mga partisipante naghatag sa “Move It” nga adunay 6,836 rider cap.
Sumala pa, dul-an sa 14,000 ka mga motorcycle taxi riders ang mawad-an og trabaho subay sa kamandoan nga giluwatan sa LTFRB, nga nipahunong usab sa ilahang operasyon sa Sugbo ug Cagayan de Oro, subay sa kamandoan nga gipirmahan.(BOMBO Irene Ardiente)
