LAPU-LAPU CITY-Andam makig-alayon si Lapu-Lapu City Mayor Junard “Ahong” Chan sa bag-ong gitukod nga Task Force sa Department of Interior and Local Government (DILG) sa imbestigasyon sa nasikop nga illegal nga operasyon sa Philippine Offshore Gaming Operator (POGO) hub sa Tourist Garden Hotel, Barangay Agus niadtong Agosto 31, 2024.
Matod pa ni DILG Secretary Benjamin “Benhur” Abalos Jr. nga maglangkob ang imbestigasyon sa hepe sa kapulisan sa dakbayan ug mismo ni Mayor Chan.
Kini aron sa pagtino sa posibleng kalambigitan sa illegal nga operasyon kung may kalabutan ba ang pipila ka kawani nga anaa sa kagamhanan lokal.
Niluwat og pamahayag ang Public Information Officer sa dakbayan nga si Mark Bautista diin gipasalig niya ang kooperasyon sa City Hall ug ni Mayor Chan sa gilusad nga imbestigasyon sa Task Force sa DILG.
Dugang pa ni Bautista nga si Mayor Chan mismo mopahigayon sa kaugalingong imbestigasyon sa palusot nga nahitabo sa iyang dakbayan.
Kon sa higayong makita sa imbestigasyon sa task force nga dunay kalambigitan o kapakyas ang mga opisyales sa dakbayan sa Lapu-lapu, mamahimo kining mag-atubang og kasong administratiba gikan sa buhatan sa DILG.
