Giuyog sa Los Angeles Lakers superstar nga si LeBron James ang basketball world human sa misteryosong post niini sa iyang social media nga daw nagsitsit sa istoryang anunsyo na ba kaha kini sa iyang pag-retiro.
Tungod niini nakamugna og nagkadaiyang reaksyon ug espekulasyon ang mitumaw ilabi na gikan sa iyang mga tigsuporta sa pangutanang mao na ba kini ang ulahing season ni “King James” sa professional basketball.
Apan sa pag-release sa maong “Second Decision” video diin ang tema kay nanukad sa iyang desisyon niadtong 2010 sa iyang pagbalhin og team gikan sa Cleveland Cavaliers ngadto sa Miami Heat, kay diay usa ra kini ka promotional endorsement promo sa usa ka tanyang nga brand sa ilimnon.
Sumala pa sa pipila nga “smart marketing” kini sa habig sa brand ingon man aduna sab nakasaway sa daw “trolling” ug “childish” move sa basketbolista.
Apan dili ikalimod sa iyang mga tagasuporta nga nagkaduol na ang panahon sa pagtapos sa karera ni James sa basketball ilabi na nga mutungtong na kini og edad nga 41-anyos sa umaabot Disyembre.
