Nidagsa sa usa ka mall sa Dakbayan sa Sugbo ang liboan ka mga drayber sa ride-hailing app gahapong adlawa, Lunes, Hunyo 15, 2026, aron makadawat sa ilang ₱5,000 nga Cash Relief Assistance (CRA) ubos sa Department of Social Welfare and Development (DSWD) Assistance to Individuals in Crisis Situations (AICS).
Ang upat ka adlaw nga payout nagtumong sa paghatag og temporaryong pinansyal nga hinabang sa mga motorcycle taxi riders, delivery service riders, ug mga drayber sa Transport Network Vehicle Service (TNVS) nga naapektuhan sa padayon nga pag-usab-usab sa presyo sa gasoline hangtud sa kasamtangan.
Sumala ni DSWD-7 Regional Director Shalaine Marie Lucero, ang staggered schedule gipatuman aron masiguro ang hapsay nga pag-apod-apod sa tabang ngadto sa kapin sa 30,000 ka mga benepisyaryo sa tibuok Central Visayas.
Ang cash aid kabahin sa mga paningkamot sa gobyerno nga makunhuran ang epekto sa nagkataas nga gasto sa gasolina sa mga trabahante sa transportasyon kansang panginabuhi nagsalig pag-ayo sa adlaw-adlaw nga operasyon sa kadalanan.
Samtang, sa eksklusibong pakighinabi sa Bombo Radyo Cebu kang Jason Santones, usa sa mga ride-hailing drivers, siya miingon nga mapasalamton siya sa maong financial assistance gumikan kay dako kini og tabang nila isip mga drayber.
Dugang pa niya, dako kini nga tabang ilabi na nga sa kasamtangan, nagkataas na ang mga presyo sa batakan ug nag-unang palaliton. Hinungdan nga dako siyang nagpasalamat sa maong hinabang tungod kay makasuporta na kini sa ilahang adlaw-adlaw nga panginabuhian.
