CENTRAL VISAYAS- Nagmalampuson ang Cebu City Police Office nga gipangulohan ni Acting City Director Police Colonel Enrico Figueroa sa pagsikop sa mga miyembro sa duha ka mga Gun for hire groups.
Kung diin, nailhan kining duha ka mga grupo sa gun for hire og ‘Nadera Gun-for-Hire group’ ug ang grupong ‘Gido Gun-for-Hire’, kinsa maoy gitumbok nga responsable sa pagpamusil nga nahitabo sa Dakbayan sa Sugbo kinsa gi-presenter sa Camp Sergio Osmeña karung adlawa Lunes, Marso 24, 2025.
Matod ni Police Brigadier General Redrico Atienza Maranan, ang Regional Director sa PRO-7, nga ang maong mga grupo nalambigit matod pa sa napulo ka insidente sa pagpamusil sa siyudad sa Sugbo sa nilabay nga buwan, semana ug adlaw.
Giila kining mga nasikop nga sila alyas “Nadera” kinsa maoy giila isip leader sa maong grupo ug si alyas “Tapiri” myembro ug sakop niining Nadera group.
Samtang sa pikas bahin aduna pay laing grupo sa gun for hire kung diin nasikop usab ang tulo ka mga sakop niini nga sila si Alyas “Garan”, Alyas “Kuya” ug “Pari”.
Subay sa pagka sikop niining mga suspek na recover usab sa mga kapulisan ang tulo(3) ka calibre 45 ug usa (1) ka submachine pistol atol sa gipahigayon nga buybust sa Dakbayan sa Danao.
Gikabutyag usab ni Police Brigader Maranan, nga sagad sa ilang biktima mao ang mga durugista nga nakadispalko o wala ka remit sa halin sa illegal nga drugas.
Nasuta nga ang mga gun-for-hire bayaran og P30,000 ngadto sa P60,000 kada mapatay nila ang subject.
Ang mga dinakpan mag-atubang og kalapasan sa Republic Act No. 10591 kun Comprehensive Firearms and Ammunition Regulation Act in relation to the Omnibus Election Code.
Gihatagan og gibug-aton ni Brigadier General Maranan, nga hugot nga gi-monitor sa otoridad ang ilang kalihukan gumikan sa hulga nga gihatag nila sa public safety ug security.
Gitumbok niini, nga kon aduna pay laing krimen nga natala sa dakbayan o sa tibuok Central Visayas, ilaha dayon nga aksyonan ang mga kriminal sama sa pagdakop sa mga suspek ug pagpasaka og tukmang kaso.(With Reports of Bombo Jairah Camello)
