Maghulma og task force ang Local Price Monitoring Council sa dakbayan sa Mandaue, aron sa pagbantay sa mga tindahan o mga establisyemento nga mipasaka sa ilang mga presyo hilabi na sa mga nag-unang palaliton sa dakbayan sa Mandaue.
Matud ni Mandaue City Mayor Thadeo “Jonkie” Ouano, nga gi-convene sa kagamhanan sa dakbayan sa Mandaue ang Local Price Monitoring Council gumikan sa mga reklamo nga nadawat sa kagamhanan hilabi na maylabut sa hisgutanan sa pagtaas og presyo sa mga palaliton.
Sigon usab ni Ouano, nga iyang gipasumiter ang mga nagkadaiyang Department Heads sa kagamhanan sa Mandaue sa ilang action plans, aron sa paglikay sa mga dili importanteng mga biyahe aron usab sa pagsulbad sa nagkataas nga presyo sa lana, maylabut sa padayung kagubot tali sa Middle Eastern Countries og sa Estadus Unidos.
Lakip sa mga susihon sa Local Price Monitoring Council mao ang giingung pagtaas sa presyo sa mga bugas tungod sa padayung kagubot sa gawas sa nasud.
Gibutyag usab sa Mayor, nga walay labut sa maapektuhan ang mga sakyanan sa mga pagtubag sa emerhensiya, sama sa mga sakyanan sa mga kapulisan, Ambulansiya ug uban pa.
