Gipatawag sa Land Transportation Franchising and Regulatory Board (LTFRB) ang walo ka bus companies tungod sa ilegal nga pagpataas sa plete nga walay pagtugot sa gobyerno.
Sumala ni LTFRB chairperson Vigor Mendoza II, ang mga kompanya sa bus nag-atubang sa posibleng pagsuspenso o hingpit nga pagkanselar sa ilang certificate of public convenience, usa ka importanteng dokumento alang sa operasyon sa pampublikong transportasyon.
Lakip sa mga gipatawag mao ang pipila ka mga kompanya sa bus nga nag-operate sa mga ruta sa Bicol Region. Diin giingong gikutlo sa mga kompanya ang taas nga presyo sa lana isip hinungdan sa pagpataas sa plete.
Ingon man nga nakasabot ang opisyal sa mga hagit nga giatubang sa mga bus companies ug uban pang mga operator sa pampublikong transportasyon apan dili nila angay gamiton kini isip rason o pasangil aron lapason ang kasamtangang mga regulasyon nga makadaot sa mga commuter.
Giinsistir sa LTFRB Chief nga dili kini madawat ug kinahanglan nilang ipasabut kung ngano nga wala sila gisilotan.
Niining bahina, ang walo ka mga kompanya sa bus gimandoan sa pagsumite og pormal nga pagpasabut sulod sa 10 ka adlaw human madawat ang show cause order ug detalye kung ngano nga dili sila angay silotan sa pagpahamtang sa dugang nga plete.
Nagpagawas usab ang LTFRB og cease and desist order, nga nagmando sa tanan nga apektadong kompanya nga mohunong dayon sa sobra nga pagpaningil sa mga pasahero.
Usa ka pormal nga husay ang gikatakda alang sa tanang walo ka kompanya sa bus sa Abril 23.
Gipasidan-an sa ahensya ang mga kompanya nga dili mosumite og katin-awan o motambong sa husay nga sila mahimong mag-atubang og multa ug dugang nga administratibong silot.
