Gipasalig sa Malacañang nga dili babagan sa gobyerno ang mga lihok protesta basta legal lang kini.
Kini taliwala sa nag-ung-ong nga sunodsunod nga mga protesta sa lain-laing grupo kalabot sa kontrobersiya sa flood control projects, farm to market roads ug uban pang isyu sa kurapsyon.
Matod ni Presidential Communications Office USec. Claire Castro nga si Presidente Ferdinand “Bongbong” Marcos Jr., nagpabiling busy sa pagtubag sa mga biktima sa mga kalamidad sama sa linog ug baha.
Ang grupong Kabataan sa Mendiola gikatakdang mohimo og lihok protesta karong Oktubre 17, samtang ang mga grupo sa mag-uuma mohimo usab og lihok protesta sa Liwasang Bonifacio karong Oktubre 21.
Dugang ni Castro nga walay makapugong kanila sa pagpahigayon og rally apan dili sila angayan nga mohimo og kapintasan.
Sa pangutana bahin sa kontrobersyal nga pamahayag ni Rep. Kiko Barzaga nga daw nanawagan og rebelyon, si Usec. Castro matod pa nga kinahanglang manubag ang bisan kinsa nga makalapas sa balaod.
Saysay ni Castro nga ang Presidente wala magtagad sa bisan unsang politika, ug nagtutok hinuon sa trabaho ug pagtabang sa katawhan.
