Gikuwestiyon ni Mandaue City Councilor, Carlo Fortuna ang kasamtangang polisiya sa trapiko nga nagmando sa dinaliang pagtanggong sa mga drayber nga nalambigit sa mga aksidente sa sakyanan nga moresulta sa pagkaangol o kamatayon.
Mipadayag usab si Fortuna, og kabalaka nga ang polisiya mahimong makalapas sa prinsipyo sa hustong proseso, ilabi na kung ang mga drayber madakpan sa dili pa matino ang kalapasan niini.
Gitataw ni Fortuna, nga komon na ang mga insidente sa trapiko sa siyudad, ug pipila ka mga residente ang nipadangat og reklamo kaniya bahin sa mga lagda sa trapiko ug giunsa kini pagpatuman.
Mitambong usab sa sesyon sa konseho si Police Lieutenant Colonel Kieth Allen Andaya, pangulo sa Traffic Enforcement Unit sa Mandaue City Police Office, niadtong Lunes, Hulyo 21.
Gipasabot usab ni Andaya nga ubos sa Rule 113 sa Rules of Criminal Procedure, ang mga drayber nga gi-ingung sad-an sa mga aksidente nga moresulta sa kamatayon o pagkaangol mahimong ipaubos sa dinaliang warrantless arrest kini subay sa Article 365 sa Revised Penal Code, nga mao ang reckless imprudence.
Gikuwestiyon ni Fortuna, ang maong pamaagi, nga matud pa kanunay nga mosangpot sa awtomatikong pagdakop bisan wala pa mapahigayon ang usa ka hingpit nga imbestigasyon, gitumbok niini ang bag-o nga kaso sa Barangay Cambaro, subay sa D.M. Cortes Street, diin ang usa ka motorsiklo nabangga sa usa ka trak ug miresulta sa pagkamatay sa angkas sa motorsikolo.
Giklaro usab niini Andaya, nga sa kataposan ang korte, ug dili ang kapolisan ang modeterminar kon kinsay legal nga sad-an sa aksidente sa trapiko.
Gihimug-atan ni Fortuna, ang kamahinungdanon sa patas nga pagtratar sa tanan nga mga partido, labi na sa mga kaso diin ang duha nga mga drayber mahimo’g adunay managsama nga responsibilidad. | Bombo Nathaniel Sandoval
