MANDAUE CITY-Gipasidunggan sa national headquarters sa Philippine National Police (PNP) ang buhatan sa Mandaue City Police Office (MCPO) isip ang pinakahilabihang nadakpan nga mga drug personalities sulod sa usa ka tuig.
Gitunol mismo ni President Ferdinand “Bongbong” Marcos Jr. ang pasidungog pinaagi sa plaque of appreciation trophy ngadto kang Mandaue City Police Director, Coronel Julius Sagandoy atol sa 123rd Police Service Anniversary sa Camp Crame sa milabay nga semana.
Subay sa mga dokumento ug statistics sa nasudnong kapulisan, ang MCPO nakatala og 1,878 ka mga dinakpan nga nalambigit sa illegal nga drogas gikan sa Marso 1, 2023 ngadto sa Abril 31, 2024.
Kini naghulagway sa way puas nga kampanya sa Kapulisan sa dakbayan sa Mandaue batok sa ilegal nga drugas.
Mipahayag usab ang tigpamaba sa MCPO nga si Lt. Col. Mercy Villaro nga ang ilang pasidungog nga nadawat gumikan usab sa pag-abag sa komunidad nga mohatag og impormasyon hinungdan nga daghang drug personalities nga ilang nadakpan sulod sa usa ka tuig.
Giklaro hinuon ni Villaro, nga way dagkong drug personalities nga nagbasi sa ilang dakbayan tungod kay sagad sa ilang mga nadakpan nga nakuhaan og kinilo nga ginadili nga drugas gikan man sa ubang lugar nga nisuway pagpamatigayon sa Mandaue.
