CEBU CITY- Nagbuy-od ug wala na’y kinabuhi ang usa ka lalaki nga manindahay og piniritong manok human kini gipusil sa may dalan F.Ramos, Brgy.Sta.Cruz, Cebu City mga alas 11 kapin karong buntag, Pebrero 27, 2025.
Giila ang biktima nga si Jade Mark Dungog, hingkod ang pangidaron, taga Tres de Abril, Barangay Labangon, usa ka fried chicken vendor kinsa gipusil samtang namaligya.
Matod sa mga saksi ang suspek nga sakay sa kolor pula nga Honda Beat nga motorsiklo niduol kang Dungog ug gipangutana kung pila ang presyo sa manok.
Human makadawat og tubag, kalit nga gipusil sa suspek si Dungog kausa, una pa miikyas sakay sa nagpaabot nga motorsiklo.
Basi sa pakisusi sa Bombo Newsteam sa dapit, ilahang gihulagway nga nagsul-ob ang ga suspek og itom nga panapton nga nagtaptap sa ilang nawong ug namatikdan nga ang gunman daw kaswal nga nangutana sa presyo sa wala pa namusil.
Naigo sa luyong bahin sa lawas ang biktima, kinsa nga nakadagan pa gikan sa iyang food cart apan nahagba ra usab ni dayon.
Gibutyag usab sa manghod sa biktima nga walay kontra ang iyang magulang, gani matag adlaw kuyog kini nga maninda.
Apan, naatlan nga atol sa maong insidente wala siya makakuyog sa iyang igsuon.
Sa pikas bahin, gisaysay usab sa amahan sa biktima nga si Edwin Dungog nga ang kaipon sa iyang anak adunay uyab-uyab nga laing lalaki nga posibling maoy hinungdan sa iyang kamatayon.
Kana gumikan kay nahimo kining hinungdan sa panag-away sa iyahang anak ug kaipon human masakpan nga aduna kini laing lalaki nga ka-text.
Ning kasamtangan, ang Abellana police station padayon pa sa ilang imbestigasyon ug nanghipos og impormasyon lakip na ang security camera footage aron mailhan ang mga suspek.
