Gisapublikar na sa National Mapping and Resource Information Authority (NAMRIA) ang opisyal nga administrative map sa Pilipinas nga klarong nagpakita sa West Philippine Sea (WPS).
Sumala sa usa ka pahayag sa NAMRIA, ang opisyal nga mapa ug nautical charts sa nasud hinungdanon sa pag-insister ug pagpanalipod sa hurisdiksyon sa kadagatan sa Pilipinas sa WPS.
Diin sukad niadtong 2012, ubos sa administrasyong Aquino, pormal nga gigamit sa gobyerno ang termino nga “West Philippine Sea” sa mga publikasyon, ug kini kanunay nga gilakip sa tanan nga opisyal nga mga mapa ug charts.
Gipasabot sa ahensya nga kini nga mga materyales gigamit sa mga marinero, tigplano, tigdukiduki, ug lainlaing mga institusyon sulod ug gawas sa nasud alang sa navigation, geographic information, ug kaluwasan sa dagat.
Sa samang higayon, namatikdan sa NAMRIA nga ang exclusive economic zone (EEZ) sa Pilipinas moabot hangtod sa 200 nautical miles gikan sa mga baseline sa arkipelago, subay sa Republic Act 9522. Ingon man nga ang datos gibasi sa tukma nga geospatial data nga makatabang sa husto nga pagtino sa mga limitasyon sa kadagatan.
Giklaro usab sa ahensya nga ang ilang mga nautical chart nagsunod sa internasyonal nga mga sumbanan sa hydrographic ug gisumite sa mga internasyonal nga teknikal nga lawas sama sa International Hydrographic Organization, aron ang datos sa Pilipinas maapil sa global maritime record.
Gipasiugda sa NAMRIA nga ang ilang mandato mao ang paghatag og tukma ug kasaligan nga geospatial nga impormasyon para sa nasud, nga hinungdanon para sa kaluwasan sa kadagatan, pagdumala sa kalikopan, pagpangandam sa katalagman, ug dokumentasyon sa nasudnong teritoryo.
Gidugang sa NAMRIA nga padayon nilang depensahan kini nga mandato isip suporta sa nasudnong soberanya ug sa hustong pagdumala sa mga kahinguhaan sa nasud.
