Gipasalig ni Executive Secretary Ralph Recto nga dugangan pa sa administrasyon ni President Ferdinand Marcos Jr. ang pondo ug suporta alang sa mga lokal nga panggamhanan aron mapadali ang paghatag og serbisyo publiko.
Matud ni Recto, moabot sa hapit P1.4 trilyon ang National Tax Allotment (NTA) alang sa local government units (LGUs) sa 2027, nga mao ang pinakadako nga alokasyon sa kasaysayan sa nasud.
Sa maong kantidad, P448.70 bilyon ang igahin alang sa 1,491 ka munisipyo, P303.56 bilyon alang sa mga probinsya, ug P263.97 bilyon alang sa mga barangay. Ang nahibiling pondo igahin alang sa mga siyudad.
Dugang pa, P58.53 bilyon ang gisugyot alang sa Local Government Support Fund (LGSF) ubos sa 2027 national budget.
Giingon ni Recto nga kini usab ang pinakadako nga alokasyon alang sa maong pondo.
Sumala niya, gamiton ang pondo sa mga proyekto sama sa pagpatukod ug pag-ayo sa mga dalan, farm-to-market roads, water systems, health facilities, ug mga bilding nga mahimong evacuation centers.
Lakip usab sa mga programang gisuportahan pinaagi sa LGSF ang pag-apod-apod og 10 ka kilo nga libreng bugas matag duha ka bulan ngadto sa hapit walo ka milyon ka pamilya.
Matud ni Recto, gipasimple usab sa gobyerno ang proseso sa paghangyo alang sa LGSF pinaagi sa pagpakunhod sa mga kinahanglanon aron mapadali ang pagpagawas sa pondo.
Gipasalig niya nga padayon nga palapdan sa gobyerno ang suporta alang sa mga LGU, ilabina sa mga programa nga epektibong makatabang sa mga lungsuranon.
