METRO MANILA-Mi-uyon si Education Secretary Sonny Angara sa pag-amendar sa Matatag Curriculum ilabina sa pagpaminos sa trabaho sa mga magtutudlo.
Sa interbyu sa Senado human sa iyang kumpirmasyon sa CA, si Angara niingon nga naminaw usab siya sa mga komentaryo bahin sa Matatag Curriculum ug usa sa mga feedback nga usahay dili makapahulay ang mga magtutudlo.
Una nang gipahibalo sa Alliance of Concerned Teachers nga ang bag-ong curriculum moresulta sa 30 porsiyento nga pagsaka sa pagtudlo sa mga maestra.
Gitataw sa kalihim nga importante nga mopahuway ang mga magtutudlo ug dili motrabaho sulod sa unom ka sunodsunod nga oras.
Gipasabot sa opisyal nga ang unom ka oras nga pagtudlo ubos sa Magna Carta of Public School Teachers maoy maximum limit sa mga magtutudlo.
Tungod niini, matod niya posible nga usbon nila ang curriculum sa umaabot.
