Gipasakaan na sa Bureau of Internal Revenue (BIR) og kasong tax evasion ang gitangtang nga mayor sa Bamban, Tarlac nga si Alice Guo.
Diin ang kaso misangpot sa pagbalhin sa mayor sa iyang shares ngadto kang Baoufu, nga mao’y property developers sa Hongsheng Gaming ug Zun Yuan Technology Inc, nga nahimutang sa yuta nga gipanag-iya ni Jack Uy, usa ka kaubang akusado sa kanhi mayor.
Matud pa ni BIR Commissioner Romero Lumagui Jr. nga wala mobayad si Guo og capital gains tax ug documentary stamp nga mokabat sa P500,000 kalabot sa pagbalhin sa mga kabtangan.
Dugang pa sa opisyal nga anaa sa balaod nga kinahanglang mobayad una og buhis ang pagbalhin sa shares ug corporate books ug pagtaho ngadto sa Securities and Exchange Commission.
Kini ang ikaduhang kaso nga giatubang ni Guo, diin ang una kay gipasakaan kini og kasong trafficking in person.
Gawas kang Guo, gipasakaan usab og kaso si corporate secretary Rachelle Carreon.
