CEBU CITY- Nibisita kang Mayor Nestor Archival ang Volunteer group ASEZ WAO (Save the Earth from A to Z, We Are One Family) gikan sa South Korea, pinangulohan sa ilang Visayas Regional Head nga si Heejin Seo, gahapong adlawa, Hulyo 31, 2025.
Gipresentar sa grupo atol sa pagbisita, ang ilang organisasyon ug ang environmental campaign nga ilang gipahugayun karon sa Pilipinas.
Gipaambit niini ang pipila ka mga kalihokan karon sa dakbayan, nga naglakip sa mga cleanup drive sa lain-laing barangay dinhi sa dakbayan sa Sugbo.
Dugang pa niini, gipangutana usab nila ang Mayor bahin sa environmental priorities sa dakbayan diin posibleng motanyag og suporta ug kolaborasyon ang ilang grupo.
Gibutyag usab ni Cebu City Mayor Archival nga prayoridad niya karon ang paglimpyo ug pag-desilting sa mga suba, ilabi na sa nasinati nga pagbaha sa dakbayan.
Subay niini, mipadayag usab ang grupo sa ilang kaandam nga mosuporta sa dakbayan pinaagi sa pagsuporta sa mga paningkamot sa pagpanglimpyo sa sapa.
Samtang, mipasalig usab sila nga suportahan ang 256K Trees Project ni Mayor Archival isip kabahin sa ilang adbokasiya sa climate change. | Via Bombo Nathaniel Sandoval
