LAPU-LAPU CITY, CEBU-Mibisita kagahapong adlawa, Hulyo 20, 2024 si Lapu-Lapu City Mayor Junard “Ahong” Chan sa mga apektadong panimalay sa pagkatumpag sa usa ka paril sa Sitio Kawot, barangay Bankal ning dakbayan sa Lapu-Lapu.
Walo ka mga panimalay ang apektado sa nahitabong insidente samtang usa ka 62-anyos nga babaye ang naangol human nalumpagan sa koral nga nahitabo niadtong Hulyo 19 sa alas 4 sa hapon.
Maayo na lang kay ang naasoy nga biktima daling nakagawas sa ilang panimalay sa dihang milagubo hinungdan nga ang tiil ra niini ang nadat-ogan.
Ang maong paril nag-alirong sa gipondong bas ug graba sa LRA SAND AND GRAVEL SUPPLY, usa ka supplier og bas ug graba nga matud pa ang suplay naggikan pa sa Albay.
Matod ni Nigel Bañacia, ang pangulo sa City Disaster Risk Reduction and Management Office (CDRRMO) sa naasoy nga dakbayan nga ang koral nahunlak ug nalumpag gumikan sa kabug-at na sa gipundo nga balas sa dapit nga gisikit gayud sa koral.
Subay sa mga residente sa maong dapit nga taod-taod na kini nga gireklamo unta sa mga residenti gumikan kay niaksyon na ug harag ang koral sa kabug-at sa mga balas nga gipundo.
Samtang kapin 12 ka pamilya ang nagub-an sa panimalay tungod sa maong insidente 6 niini gikatahong totally damaged.
Apan mipasalig ang tag-iya sa patigayon nga moabaga sa pagpaayo sa naguba nga mga panimalay.
