Gikwestiyon ni Cebu City Councilor Pastor “Jun” Alcover ang gisugyot nga P12.5 milyones nga abang sa opisina nga luna nga nahimutang sa Cebu I.T Park alang sa programang “Mayor of the Night” ni Vice Mayor Tomas Osmeña.
Matod niini nga wala pa giaprobahan sa City Council ang mismong inisyatiba, sa pagpakighinabi sa Bombo Radyo News team kang Alcover, mibutyag nga ang konseho kinahanglang modesisyon una kon aprobahan ba ang programang “Mayor of the Night” sa dili pa mogahin og pundo alang sa pag-abang sa opisina.
Gihulagway usab ni Alcover ang mga lakang nga gihimo ni Osmeña nga usa ka unconstitutional ug illegal nga paagi gumikan kay matud pa niini wala kini executive power ug ga usik-usik lang kini ug pundo gumikan kay walay ahensiya sa gobyerno ang mag-operate og 24 hours.
Gihimug-atan usab sa opisyal nga mamahimo rang ipaagi sa online ang pagproseso sa tanang transaction sa mga call center agents gumikan kay eksperto man kini sila sa digital ug dili kinahanglan nga ibutang mismo sa I.T Park ang opisina.
Sa pikas bahin, sigon usab niini nga kinahanglang mo pagawas og pamahayag si Mayor Nestor Archival, bahin niini gumikan kay siya ang gipili nga mayor sa mga katawhan ug kinahanglang mo barug siya niini.
Giklaro usab sa opisyal nga ang isyu dili ang pagpangabang sa bise-mayor apan kung na aprobahan na ba ang programang “Mayor of the Night” ni Osmeña sa Mayor ug sa konseho gumikan kay wala pa gani matuki sa konseho nakig negosasyon na kini.
Nanghinaot usab si Alcover nga unta makarealize si Osmeña nga dili advisable ang iyang mga lakang gumikan kay maglisod gani kini ug pahigayun sa session apan mosud na hinoun kini sa Mayor of the Night.
