CENTRAL VISAYAS-Gitambagan ang mga konsumidor sa Visayan Electric Company nga mahimong ‘mindful’ sa ilang paggamit sa kuryente tungod adunay pagtaas sa rate gikan sa Hulyo hangtod sa Agosto ning tuiga.
Matud sa Visayan Electric Company, sa usa ka press statement, mipahibalo nga ang ilang residential consumers kay makasinati og usbaw nga P3.56 kada kilowatt hour (kWh), ug adunay kinatibuk-ang rate nga P13.27/kWh billing sa Hulyo ngadto sa August.
Asoy pa nga ang pagtaas sa rate tungod sa taas nga presyo sa elektrisidad sa Wholesale Electricity Spot Market (WESM) ug ang pagdugang sa second installment sa WESM payables alang sa Mayo.
Nagkanayon ang electric utility nga ang adjustment sa rates nagpasabot nga ang mga residential customers nga mokonsumo og labing menos 200 kWh matag buwan mag-atubang og dugang bayad nga P712 sa sunod nilang bayronon.
Ingon man nga nagpagawas ang Energy Regulatory Commission (ERC) niadtong Mayo og kamanduan nga nagpatuman sa upat ka bulan nga staggered nga pagbayad alang sa pagpalit sa kuryente nga gihimo sa mga distribution utilities, sama sa Visayan Electric Co., gikan sa WESM niadtong Mayo.
