CEBU CITY — Gipasigarbo sa Provincial Government sa Siquijor ang pagka-COVID-free niini human nga nagpabiling zero ang natalang kaso.
Matud sa gobernador nga si Zaldy Villa nga daan nang gisirad-an ang tanang borders sa lalawigan sukad nga naigo ang virus sa Negros Oriental.
Daan nang naka-alerto ang mga sakop sa kapulisan ug local health authorities aron makaresponde kun ugaling adunay pasyenteng matakbuyan sa coronavirus.
Ubos sa gipatumang enhanced community quarantine, wala hinuon gipalarga ang mga sakyanang pandagat apan nagpabiling operational ang mga establisimento.
Gibutyag ni Villa nga nanawagan ang mga foreign ambassadors kaniya aron i-repatriate ang mga anaa sa lalawigan apan mas gipili hinuon sa mga langyaw nga magpabilin sa isla tungod kay luwas sila.
Samtang gipadad-an nila og hinabang ang mga taga-Siquijor nga anaa sa mga kasikbit nga probinsya kinsang wala pa makauli tungod sa quarantine measures.
Gikalipay usab sa gobernador nga nagnegatibo sa coronavirus ang mga patients under investigation human gipaubos sa quarantine.
