CENTRAL VISAYAS-Mapasalamaton ang mga magtutudlo sa Cebu human sa pag-anunsyo sa Department of Education (DepEd) nga ang tinuig nga vacation service credit leave sa mga magtutudlo kay umentohan gikan sa 15-ka adlaw ngadto na sa 30-ka adlaw.
Kini atol sa pagpasar ni Education Secretary Sonny Angara sa DepEd Order No. 13, s. 2024 o ang Revised Guidelines on the Grant of VSCs for Teachers nga nagtugot sa umento sa panahon ikabakasyon sa mga magtutudlo sa mga pampublikong tunghaan.
Sa ekskusibong pakighinabi sa Bombo Radyo Cebu kang Raul Constantino, ang lider sa Teacher Dignity Coalition Cebu Chapter nga dakong pasalamat nila sa maong pagpasar sa umento sa adlaw pahuway sa mga magtutudlo ilabi na nga nagtapun-og gihapon ang mga trabahuon sa mga magtutudlo kada school year.
Dugang pa niya, nakig-diyalogo ang grupo sa Teachers Dignity Coalition sa usa ka senador sa kaulohan alang sa legislative action nga makapasar og dugang sweldo sa mga magtutudlo nga P15,000 across the board.
Giingong ang kasamtangang salary adjustment gikaon lang sa inflation ug mga bayranan sa buhis nga dili makatupong sa ilang trabaho nga responsable sa mga classroom.
