LAPU-LAPU CITY, CEBU- Hingpit nang ma-access sa mga personahe sa National Bureau of Investigation – Central Visayas Regional Office (NBI-CEVRO) ang mga computers nga nasakmit nila sa Tourist Garden Hotel sa Barangay Agus dakbayan sa Lapu-Lapu human nga miduso na kini ug search warrant application sa Korte sa maong dakbayan.
Kini aron Ma-disclose ang mga computer data sa mga electronic gadgets nga makatabang sa imbestigasyon sa nasudnong agenda sa pagpukan sa aktibidad sa POGO sa tibuok Pilipinas.
Matod pa ni NBI-CEVRO Regional Director Atty. Rennan Augustus Oliva sa press conference niini gahapong adlawa Biyernes, Oktubre 11, 2024, nga ilaha na kini nga ipasaka sa Cyber Crime Court sa dakbayan sa Lapu-Lapu sunod semana sa Oktubre 21.
Dugang pa ni Oliva, nga unahon nila nga ma-access ang mga computers sa mga kadagkuan sa maong operasyon sa POGO apil na katong nasakmit nila sulod sa mga vaults nga posibling adunay mga sensitibong impormasyon ang ilang makuha.
Gitumbok niini, nga ang kamandoan sa ‘Anti-Money Laundering Council’ gikan sa kaulohan aron makaduso usab sa kasong ‘Money Laundering’ sa mga nahabilin pa nga mga vaults sa premises sa naronda nga ‘POGO hub’ sa dakbayan sa Lapu-Lapu.
Human sa giingong aplikasyon sa mao nga search warrants, matod ni Atty. Oliva nga muari sa Sugbo ang AMLAC aron sa pagsustiner sa imbestigasyon kalabot sa uban pang dokumento nga iduso sa korte sa kalapasan niining aktibidad sa POGO.
