CEBU – Nipahigayon og rally ang mga paryente sa Barangay Apas sa Times Square sa New York.
Sa nahimong rally, gi-awhag sa mga indibidwal si Presidente Ferdinand Marcos Jr., nga pugngan ang demolition sa mga balay sa 158 ka mga pamilya sa Barangay Apas, dakbayan sa Sugbo.
Kahinumdoman nga nahimong subject sa legal battle ang Lot 937 sa Sitio San Miguel sa Barangay Apas sulod na sa kapin sa 10 ka tuig.
Nasayran nga nagsugod sa pagbalhin sa lugar ang mga residente niadto pang 1960s ug nagsugod sa pagtukod ug permanenteng mga balay nga adunay kasiguruhan sa dugay nga pag-okupar gikan sa lokal nga mga awtoridad.
Niadtong tuig 2019, dili moubos sa 200 ka pamilya ang nag-okupar na sa maong lugar.
Apan, usa ka Mariano Godinez ang miangkon sa pagpanag-iya sa propiedad niadtong 2010 ug mihangyo nga gub-on ang mga gipangtukod nga istruktura sa maong luna.
