Nipahimangno ang hepe sa Philippine National Police nga si General Rommel Francisco Marbil sa mga pulis nga kung mapamatud-an nga nanalipod sa mga ilegal nga Philippine Offshore Gaming Operators (POGOs) mag-atubang sila og disciplinary actions.
Sa usa ka pamahayag, ang kadagkoan sa PNP nagkanayon nga ang integridad ug responsibilidad maoy ilang pundasyon sa pagserbisyo sa katawhan busa pabilin silang nakatutok sa pagsiguro nga ang ilang mga opisyal mopatigbabaw niini nga mga mithi.
Matod niya nga nagsilbi usab kini nga pahinumdom nga ang pag-apil sa ilegal nga kalihokan hatagan ug tukmang aksiyon.
Una niini, gihingusgan sa PNP ang ilang kampanya batok sa mga ilegal nga POGO nga miresulta sa daghang malampusong operasyon.
Gipangunahan sa Criminal Investigation and Detection Group (CIDG) ug Anti-Cybercrime Group (ACG) ang paningkamot nga mabungkag ang daghang mga ilegal nga operasyon sa POGO sa nasud nga miresulta sa pagkasikop sa daghang mga indibidwal ug pagkasakmit sa mga gidili nga kagamitan.
