Padayon nga midagayday ang mga luha ug emosyon sa mga taga Sugboanon nga mga supporters ni Kanhi-Presidente Rodrigo Duterte.
Sa ikaduhang adlaw sa pagpahigayon og prayer rally diin gipangulohan sa Maisug Cebu sa Plaza Independencia, gabii kay mas nidoble ang mga tawo nga misalmot ug mipakita sa ilang hugot nga suporta ngadto sa gidakop nga kanhi Presidente.
Atol sa pakighinabi sa Bombo Newsteam kang Pam Baricuatro, Convenor, Maisug Cebu diin giklaro niini nga ang ilang pagpahigayon og prayer vigil kay usa lamang ka healing process sa ilang nabati nga kasakit gumikan sa gidangatan sa kanhi leader sa Pilipinas.
Dugang pa niini nga ang ilang gibuhat nga panagtapok kay dili pagpakita og pagsupak o pagmugna og kagubot sa kasamtangang administrasyon apan ang ilang tumong kay aron ipadayag nga hilabihan sila nga nasakitan sa pagkasikop ug pagdala sa kanhi-Presidente ngadto sa The Hague, Netherlands diin nahimutang ang International Criminal Court.
Samtang, padayon usab ang mga lanog sa mga busina gikan sa mga sakyanan ug mga motorista, ignon man nga nag-abot sa kadalanan aron ipasiugda ang noise barrage agi’g pagpadayag usab og supporta ngadto sa Kanhi Presidente ug ang ilang pagpaabot nga mauli kini balik sa nasud.
