“Milagro” nga tubig sa estatuwa sa India, gikan diay sa aircon

Nakadani og daghang deboto ug bisita ang usa ka elepante nga estatuwa sulod sa templo sa India human kini makita nga giingong nagtulo og “holy water” o balaang tubig.

Tungod niini, daghang tawo ang mituo nga milagroso ang tubig ug ilang gikuhaan, gipahid sa lawas, ug adunay uban nga misulay pa og inom niini.

Apan human sa imbestigasyon, nasayran nga dili diay milagro ang tinubdan sa tubig, gumikan nadiskobrehan nga kini gikan lamang sa tulo sa air conditioner nga nahimutang duol sa estatuwa.

Tungod sa nahitabo, gipahimangnoan ang publiko nga dili dayon motoo sa mga susamang panghitabo kung walay klarong ebidensya aron malikayan ang sayop nga impormasyon ug posible nga maangkong peligro sa panglawas.