Gisaway ang proyekto sa Engineer ug content creator Slater Young sa social media tungod sa giingong dako nga kalambigitan niini sa grabeng pagbaha sa probinsya sa Cebu.
Ang kusog nga ulan ug pagbaha nga dala sa Bagyong Tino karong semanaha mibalik sa isyu ug pangutana bahin sa “The Rise at Monterrazas”, usa ka proyekto sa pabalay sa bukid nga gidumala ni Young.
Bisan walay opisyal nga report nga nagpamatuod sa koneksyon sa proyekto sa pagbaha, daghang mga netizen ang nanawagan pag-usab ug nagpaambit sa ilang mga kabalaka bahin sa pag-uswag sa bakilid ug sa pag-dagayday sa tubig gikan sa bukirang bahin ngadto sa bahin sa siyudad sa Sugbo.
Ingon man nga basi sa nangaging mga report, ang bahin sa Barangay Guadalupe diin gitukod ang proyekto, giisip kini nga dali nga madahili ang yuta ug pagbaha.
Apan, kung kahinumduman sa usa ka interview kang Young kaniadtong 2023, si Young miingon nga ang proyekto nakaagi og geological review ug adunay mga runoff-control system aron mapugngan ang sobra nga tubig.
Sa pagkakaron, wala pa siyay gipagawas nga bag-ong pahayag human miinit pag-usab ang isyu tungod sa pagbaha sa Cebu nga gipahinabo sa Bagyong Tino.
