Misaad si NATO Secretary-General Mark Rutte og dugang nga suporta sa Ukraine ug ang pagpalig-on sa depensa subay sa sidlakang utlanan sa alyansa human sa sunod-sunod nga pag-atake sa mga drone sa Russia duol sa Poland.
Gipagawas ang maong pahayag human giatake sa Russia ang usa ka tren ug usa ka crossing point, pila lang ka minuto human makalabay ang tren nga gisakyan nilang kanhi UK Prime Minister Boris Johnson ug kanhi Swedish Prime Minister Carl Bildt.
Hugot nga gikondena sa mga opisyal sa Europa ug Poland ang maong insidente.
Nagpasidaan usab si Polish Prime Minister Donald Tusk nga posibleng mograbe ug magpadayon pa ang mga aksyong sabotahe sa Russia sa mga utlanan sa sunod nga mga bulan.
Taliwala sa maong mga hitabo, giangkon ni US President Donald Trump sa social media nga giingong miuyon ang Russia ug Ukraine nga hunongon ang pag-atake sa energy infrastructure sa matag usa aron mapaubos ang presyo sa lana ug diesel.
Samtang, mipahayag si Ukrainian President Volodymyr Zelenskyy nga andam silang ihunong ang pag-atake sa pasilidad sa enerhiya sa Russia kon maghatag og garantiya ang ilang mga kaalyado nga ihunong usab sa Moscow ang pag-atake sa ilang suplay sa pagkaon ug pasilidad—usa ka lakang nga iyang gihulagway nga unang lakang padulong sa kalinaw.
