Bisan tuod nagpabilin siyang usa sa labing maayong mga magduduwa karon sa basketball, giingong dili makalikay si 2-time NBA champion Kevin Durant nga maghunahuna kabahin sa pagretiro.
Matod sa 35-anyos nga forward nga kanunay niyang gihunahuna ang pagretiro samtang nagbag-o ang panahon ug nagkatigulang na siya.
Hinuon, nanghinaot ang batikang basketbolista nga magpabilin siya og dugay sa liga ilabi na nga wala na siya masayod kon unsay iyang pagkabuhaton kon moretiro na siya.
Subo sab si Durant nga moabot ang adlaw nga moretiro na siya sa pagduwa og basketball sanglit matud pa niya nga sukad sa 8 anyos pa siya ini dinhi na lang nagtuyok ang iyang kinabuhi.
Si Durant maoy No.2 overall pick sa 2007 NBA draft nga gipili sa kanhi Seattle SuperSonics.
Usa siya sa labing karaan nga mga magdudula nga karon nagdula sa liga diin sa iyang draft year, upat na lang silang nahabilin kauban si Al Horford, Mike Conley ug Jeff Green.
Atol sa iyang karera sa pagdula sa NBA, naghupot siya og duha ka kampiyonato, 14 ka All-Star appearances, duha ka Finals MVP, ug usa ka regular season MVP.
Siya karon nagdula sa Phoenix Suns kauban ang usa sa labing maayo nga scorer nga si Devin Booker.
