Hugot nga gibantayan karon sa National Capital Region Police Office (NCRPO) ang mga lugar nga gitudlo isip mga venue alang sa mga protesta karong Setyembre 21, ang anibersaryo sa deklarasyon sa Martial Law.
Lakip niini ang mga lokasyon daplin sa EDSA, Chino Roces Bridge (CRB) sa Mendiola, JP Laurel Street, Ayala Bridge, TIP Manila, San Sebastian Church, University of the East, ug uban pa.
Ingon man nga nagpahigayon ang NCRPO Officer-in-Charge nga si Brig. Gen. Christopher Abrahano og ocular inspection sa mga nag-unang dalan ug lugar sa Manila isip kabahin sa mga pagpangandam.
Matod ni Gen. Abrahano, gikinahanglan nga masusi nang daan ang mga ruta nga posibleng gamiton ug ang mga lugar diin mahimong ipahigayon ang mga kalihokan—sama sa mga demonstrasyon, protesta, ug martsa.
Gipahinumdoman usab sa General ang mga pulis nga magpabiling alerto samtang nagbantay niining mga lugara ug sigurohon ang kaluwasan ug kahusay sa publiko.
Dugang pa, giawhag niya ang kapulisan nga tahuron ang mga katungod sa mga lungsoranon ug tugotan sila nga magpahigayon og malinawon nga mga panagtapok aron ipadayag ang ilang mga sentimento.
