Gipasidan-an sa North Korea nga ikonsiderar niini nga usa ka ‘declaration of war’ kung ang South Korean drone mosulod pag-usab sa airspace niini.
Basi sa taho sa North Korea nga ang military drone sa SoKor nisulod sa kahanginan niini katulo ka higayon karong Oktubre aron lang mo-apud-apod og mga propaganda leaflets; butang nga gipanghimakak sa South Korea.
Sumala sa North Korean Defense Ministry, kung makakita kini og susama nga mga drone, ila dayon kining isipon isip deklarasyon sa gubat ug maghimo dayon og tukmang tubag.
Ingon man nga dili kini magpanuko sa paghimo og tukma nga tubag sa militar kung adunay mahitabo nga balik-balik nga pagpalupad sa drone.
Namatikdan, ang una nga taho sa NoKor nag-ingon nga ang mga drone nakasulod sa kahanginan sa Pyongyang ug sigurado nga dili kini mahimo nga gipalupad sa usa ka sibilyan nga organisasyon nga nag-inusara.
Gitataw sa NoKor nga gikinahanglan pa ang runway sa pagpalupad sa maong mga drone.
