CEBU CITY-Temporaryo nga gisuspenso sa Office of the Building Official, o OBO, sa dakbayan sa Sugbo ang operasyon sa condo unit diin nahulog ug namatay ang kwatro anyos nga bata.
Kini human ang OBO, pinangulohan sa ilang hepe nga si Architect Florante Catalan, nipahigayon og ocular inspection niadtong Huwebes sa buntag.
Base sa ilang pag-inspeksyon, niingon sila nga ang mga unit sa nahisgutang condominium dunay duha ka disenyo: ang usa adunay terrace ug ang usa wala.
Ilang nasuta nga nahulog ang bata gikan sa unit nga nahimutang sa 27th floor nga walay terrace.
Dugang pa niya nga ang klase sa bintana nga giagian sa bata mao ang “awning type.”
Kung kahinumduman, nga ang insidente nahitabo niadtong Lunes, Abril 8, 2024.
Diin ang biktima unang nitugpa sa canopy sa skyrise, nga nahimutang sa ikatulong andana sa condo. Nahulog ang bata gikan sa 27th floor.
Human sa ocular inspection, nga milungtad og usa ka oras ug 30 minutos, si Catalan niingon nga ilang gimandoan ang management nga suspensuhon ang portion sa maong builing diin nahitabo ang trahedya.
Dugang pa, nga ang OBO mag-require usab sa management nga susihon pag-usab ang architectural design sa ilang mga bintana aron malikayan ang maong trahedya nga mahitabo pag-usab.
