MANDAUE CITY-Gisugdan na sa kagamhanang dakbayan sa Mandaue ang pagtangtang sa mga redundant utility poles aron sa pagsulbad sa mga low-hanging ug spaghetti wires sa dakbayan ngadto sa Ouano Avenue, North Reclamation Area kagahapong adlawa sa Lunes, Nobyembre 18, 2024.
Kani mao ang ceremonial nga implementasyon sa Single-Pole Ordinance (City Ordinance 16-2024-1883) sa dakbayan human kini naaprobahan sa konseho sayo rong tuiga.
Matod pa ni Engr. Raul Lucero, ang Chief Operating Officer (COO) ug Presidente sa Visayan Electric Company (VECO) diin tataw niya nga ang ubang mga utility providers sama sa telecommunications ug cable companies kay i-consolidate na ang ilang mga wire sa mga poste sa VECO.
Ingon man nga kini nga lakang nagtumong sa pagwagtang sa redundant poles ug sa mga delikadong spaghetti wires.
Dugang ni Lucero nga ang one-pole policy magpugong usab sa mga container trucks ug heavy equipment nga malambigit sa electrical wires, nga mahimong hinungdan sa pagkawala sa kuryente o disgrasya.
Gawas sa VECO, gitambongan sab nila Mandaue City Mayor Glenn Bercede ug ni City Councilor Jimmy Lumapas ang nahitabong ceremonial nga implementasyon nga nag-una sa tibuok lalawigan sa Sugbo sa pagpatuman sa maong ordinansa.
