PROVINCE OF CEBU-Mokabat sa P1.5 Million nga balor sa ilegal nga drogas ang nasakmit sa Cebu Police Provincial Office sa tulo ka adlaw nga Simultaneous Anti Criminality Law Enforcement Operations SACLEO gikan sa Agusto 12-14, 2023.
Ang tulo ka adlaw nga anti-criminality operations miresulta sa pagkasikop sa 74 ka mga personalidad ug pagka sakmit sa 222.43 gramos sa gituohang shabu nga dunay standard drug price nga P1,512,524.
Nakasikop usab ang 14 ka mga most wanted persons atol sa sub-sub nga pag serve sa mga warrant of arrest samtang 47 ka mga akusado sa lain-laing kaso ang nadakpan usab.
Sa kampanya sa kapulisan sa lalawigan sa Sugbo sa illegal nga sugal moabot sa 87 ka tawo ang ilang nadakpan nga naatlan nga nanugal ug P11,098 nga cash ang ilang naimbargo.
Samtang gihingusgan usab sa CPPO ang ilang pag gukod sa mga loose firearms diin duha ang nadakpan pinaagi sa search warrant nga giluwatan sa korte nga mi resulta sa pagka sakmit sa 40 ka mga dili lisensyado nga armas.
Nasikop usab ang nagka lain-laing police station sa kalungsuran sa probinsya sa Sugbo og 231 ka mga tawo nga nakalapas sa mga ordinansa ug 838 ka tawo ang na isyuhan og citation ticket.
Subay niini, misaad ang bag-ong milingkod nga Officer In Charge sa Cebu Police Provincial Office Police Colonel Noel Flores nga doblehon pa nila ang ilang trabaho aron masiguro ang kaluwasan sa mga Sugboanon gikan sa krimen.
