MANDAUE CITY-Nakuhaan sa gibana-banang 2.5 kilos sa gituohang shabu ang usa ka 41-anyos nga babaye atol sa gipahigayong buy-bust operation sa Sitio Aroma, Barangay Subangdaku sa dakbayna sa Mandaue niadtong Biyernes Abril 11, 2025.
Kun diin ang dinakpan kay giila sa alyas nga si “Bebe” nga giilang High Value Individial sa Anti-Drugs Operation sa Mandaue City Police Office (MCPO) nga usa ka repacker ug lumulupyo sa Barangay Tejero sa silingang dakbayan sa Sugbo.
Gibana-banang nagbalor ang nakuhang illegal nga druga sa dinakpan sa P13.6-milyones.
Gipangulohan ni Mandaue City Police Station 2 Commander Police Major Jade Sumugat uban sa koordinasyon sa mga ahente sa Philippine Drug Enforcement Agency – Central Visayas (PDEA-7).
Gawas sa binultong druga kay nakuha usab niini ang nagkadaiyang drug paraphernalia lakip na ang gigamit na buy-bust money sa mga awtoridad.
Giangkon sa dinakpan ang maong kontrabando ug matod pa nga gikan iyang suplay sa ginadiling druga sa usa ka alyas “Pikot” gikan sa dakbayan sa Sugbo ug ang nahipos nga 2.5 kilos kay madispose kini niya sulod lang sa usa ka buwan.
Daan na naaresto si alyas “Bebe” niadtong Disyembre 2022 sa samang kaso sa ginadiling druga apan nakagawas kini tungod sa Plea Bargaining Agreement niadtong Agosto 2024.
Susamang kalapasan sa Republic Act No. 9165 o Comprehensive Dangerous Drugs Act of 2002 ang atubangon niini.
